Deputeti Avdullah Hoti ka bërë thirrje për reagim urgjent dhe masa konkrete nga institucionet pas dëmeve të mëdha të shkaktuara nga stuhia me erëra të forta dhe reshje të dendura në Kosovë. Ai ka theksuar se janë dëmtuar biznese, automjete, prona private dhe infrastruktura, ndërsa sektori i bujqësisë ka pësuar goditjen më të rëndë, duke shkatërruar investimet e fermerëve për një vit të tërë. Hoti ka kërkuar që institucionet të dalin menjëherë në terren për të evidentuar dëmet dhe për të ofruar kompensim për familjet, bizneset dhe fermerët e prekur. Ai ka nënvizuar se mbështetja ndaj qytetarëve në këto raste është një detyrim institucional dhe përgjegjësi njerëzore, duke theksuar se askush nuk duhet të mbetet vetëm përballë pasojave të kësaj fatkeqësie natyrore.