Deputeti i Partisë Demokratike të Kosovës, Enver Hoxhaj, ka reaguar pas deklaratës së kryeministrit në detyrë, Albin Kurti, për 36-vjetorin e Kushtetutës së Kaçanikut. Hoxhaj e akuzon Kurtin se, ndërsa thur vargje për këtë dokument historik, në praktikë po shkel dhe përdhos Kushtetutën e Republikës së Kosovës, duke rrënuar themelet juridike dhe politike të shtetit. Ai kujton se Kushtetuta e Kaçanikut ishte një akt guximi dhe rezistence kombëtare që hapi rrugën për lirinë dhe pavarësinë e Kosovës, ndërsa Kurti, sipas tij, e kundërshton këtë vizion që nga fillimi i karrierës së tij politike. Hoxhaj përfundon duke theksuar se nderimi i Kushtetutës nuk bëhet vetëm me fjalë përkujtimore, por me respektimin dhe zbatimin e saj në praktikë.