Enver Hoxhaj, kandidat për deputet nga Partia Demokratike e Kosovës, ka reaguar pas avancimit të Shqipërisë në procesin e integrimit evropian, duke kritikuar qeverisjen e Albin Kurtit. Ai theksoi se Kosova ka humbur gjashtë vite të rëndësishme për shkak të izolimit dhe përplasjeve politike gjatë këtyre viteve. Hoxhaj deklaroi se një qeveri e PDK-së do ta kishte çuar Kosovën përpara në planin ndërkombëtar, duke përmendur anëtarësimin në NATO, marrjen e statusit të kandidatit për Bashkimin Evropian dhe përmbylljen e anëtarësimit në Këshillin e Evropës. Ai premtoi se objektivi kryesor i PDK-së në katër vitet e ardhshme do të jetë integrimi euroatlantik i Kosovës dhe sigurimi i njohjeve të reja ndërkombëtare, duke rikujtuar sukseset e kaluara të partisë në këtë drejtim.