Deputeti i PDK-së dhe ish-ministri i Jashtëm, Enver Hoxhaj, ka kritikuar ashpër vendimin për dhënien e tokave të Manastirit të Deçanit, duke e cilësuar atë si një akt që trajton Kosovën si pronë personale për t’u falur sipas hatrit. Ai ka ngritur pyetje për arsyet dhe interesat pas vendimeve të tjera të rëndësishme për Kosovën, si pranimi i vetëmenaxhimit në marrëveshjet e Ohrit dhe Brukselit, rikthimi i Rezolutës 1244 dhe përdorimi i pasaportave serbe nga qytetarët e Kosovës për lëvizje pa viza në BE. Hoxhaj ka theksuar se Kosova është shtet sovran dhe nuk duhet trajtuar si pronë që i jepet dikujt për interesa personale. Deklarata e Nenad Rashiq, sipas të cilit Albin Kurti ka marrë vendimin për tokën e Manastirit të Deçanit për shkakun e tij, ka nxitur këtë reagim të fortë nga Hoxhaj.