Instituti i Kosovës për Drejtësi (IKD) ka publikuar raportin “Qasja e ekzekutivit në të dhënat penale të qytetarëve”, ku analizon Draft Udhëzimin Administrativ për qasjen e Ministrisë së Drejtësisë (MD) në Sistemin e Evidencës Penale (SEP). Sipas raportit, Draft-Udhëzimi tejkalon kompetencat ligjore të MD-së duke i lejuar asaj qasje të pakufizuar, përfshirë tërheqjen, kopjimin, përpunimin masiv dhe ruajtjen pa kufizime kohore të të dhënave penale të qytetarëve. IKD thekson se kjo shkel parimet e mbrojtjes së të dhënave personale dhe krijon rrezikun e përdorimit arbitrar ose politik të informacionit penal, duke cenuar kontrollin institucional të sistemit gjyqësor.