Instituti i Kosovës për Drejtësi (IKD) i ka bërë thirrje Kuvendit të Kosovës që të mos kalojë me procedurë të përshpejtuar Projektligjin për Byronë Shtetërore për Verifikimin dhe Konfiskimin e Pasurisë së Pajustifikueshme. IKD thekson rëndësinë e adresimit të të gjitha mangësive ndërmjet dy leximeve parlamentare, për të siguruar që ligji të jetë në përputhje me Kushtetutën dhe të kalojë testin në Gjykatën Kushtetuese. Megjithëse shumica e rekomandimeve të mëparshme janë marrë parasysh, ende mbeten çështje të hapura si mënyra e zgjedhjes së Drejtorit të Byrosë, mungesa e një divizioni të specializuar në Gjykatën e Apelit, kompensimi i palëve në rast dështimi të konfiskimit, barra e provës në procedurë, roli i Drejtorit në miratimin e Kodit të Mirësjelljes dhe përkufizimi i blerësit me mirëbesim. Duke qenë se ky projektligj është rrëzuar dy herë nga Gjykata Kushtetuese dhe po shqyrtohet për herë të tretë, IKD kërkon trajtim të kujdesshëm dhe gjithëpërfshirës për të shmangur probleme ligjore dhe për të garantuar mbrojtjen e të drejtave të njeriut.