Instituti i Kosovës për Drejtësi (IKD) ka nisur një fushatë në Gjakovë për mbledhjen e nënshkrimeve në kuadër të një nisme legjislative qytetare që synon ndryshimin dhe plotësimin e Kodit Penal të Kosovës. Aktiviteti zhvillohet në Çarshinë e Madhe nga ora 10:00 deri në 15:00, ku qytetarët informohen për përmbajtjen e nismës dhe mund të japin mbështetjen e tyre me nënshkrim. Nisma propozon sanksionimin penal të moszbatimit të qëllimshëm të vendimeve të Gjykatës Kushtetuese dhe të përdorimit të parasë publike për përfitim elektoral gjatë periudhave zgjedhore dhe parazgjedhore. Ky aktivitet është pjesë e një serie takimesh që IKD ka zhvilluar më parë në Prishtinë, duke ftuar qytetarët të angazhohen dhe të njihen me ndryshimet e propozuara.