Instituti i Kosovës për Drejtësi (IKD) ka nisur një nismë legjislative qytetare për ndryshimin dhe plotësimin e Kodit Penal të Republikës së Kosovës. Nisma përfshin dy propozime kryesore: përcaktimin si vepër penale të moszbatimit të qëllimshëm të vendimeve të Gjykatës Kushtetuese dhe sanksionimin penal të përdorimit të parasë publike për përfitim elektoral gjatë periudhave zgjedhore dhe parazgjedhore. IKD ka vendosur një stendë në sheshin “Nëna Terezë” në Prishtinë, ku qytetarët mund të informohen dhe të mbështesin nismën me nënshkrimet e tyre. Instituti i bën thirrje qytetarëve që të kontribuojnë në këtë proces për të forcuar sundimin e ligjit dhe për të parandaluar keqpërdorimin e parasë publike në fushata zgjedhore.