Platforma Hibrid.info ka bërë thirrje për një transparencë më të madhe në përdorimin e inteligjencës artificiale në komunikimin politik në Kosovë. Përdorimi i përmbajtjeve të gjeneruara me IA po rritet në fushatat zgjedhore, ku ato shërbejnë për ilustruar premtime elektorale dhe për të komentuar situatën shoqërore, por ekziston rreziku që publiku t’i perceptojë si ngjarje reale. Aktualisht nuk ka një rregullim ligjor në Kosovë që kërkon etiketimin e këtyre përmbajtjeve, ndërsa standardet evropiane kërkojnë identifikimin e qartë të përmbajtjeve sintetike për të shmangur dezinformimin. Hibrid.info vazhdon të avokojë për vendosjen e mekanizmave që sigurojnë etiketime dhe deklarime të qarta, duke theksuar se përdorimi i IA-së duhet të jetë i pranueshëm vetëm kur qytetarët informohen qartë për natyrën e përmbajtjes që konsumojnë.