Kryeministri i Kosovës, Albin Kurti, së bashku me ministrin e Financave, Hekuran Murati, zhvilluan një takim me përfaqësuesit e Bankës Evropiane për Rindërtim dhe Zhvillim (BERZh) për të diskutuar thellimin e bashkëpunimit dhe avancimin e projekteve infrastrukturore në vend. Në fokus ishte zbatimi i Memorandumit të Mirëkuptimit të nënshkruar në vitin 2024, që parashikon investime deri në 400 milionë euro deri në vitin 2027. Gjatë takimit u trajtuan projektet prioritare në fushat e infrastrukturës rrugore, ujërave të zeza, sistemit të ujit, efikasitetit të energjisë dhe transportit publik, si dhe mundësitë për nënshkrimin e marrëveshjeve të reja financimi për vitet 2026–2027. Kryeministri Kurti falënderoi BERZh-in për mbështetjen e vazhdueshme dhe theksoi rëndësinë e partneritetit për realizimin e projekteve strategjike, ndërsa përfaqësuesit e BERZh-it riafirmuan gatishmërinë për bashkëpunim të ngushtë në zbatimin e projekteve zhvillimore dhe reformave ekonomike.