Zëvendëskryeministrja dhe Ministrja e Drejtësisë në detyrë, Donika Gërvalla-Schwarz, mori pjesë në ceremoninë e hapjes së “Javës për Ndihmë Juridike Falas” në një konferencë me temën “Të bashkuar për qasje në drejtësi për të gjithë”. Ky aktivitet synon të promovojë rëndësinë e ofrimit të ndihmës juridike falas dhe të avancojë qasjen e barabartë të qytetarëve në sistemin e drejtësisë. Në konferencë morën pjesë përfaqësues të institucioneve vendore dhe ndërkombëtare, ekspertë të fushës së drejtësisë dhe organizata që punojnë për fuqizimin e sundimit të ligjit dhe mbrojtjen e të drejtave të qytetarëve. Ky event nënvizon përpjekjet për të siguruar që të gjithë qytetarët të kenë mundësi të barabarta për t’u mbrojtur ligjërisht.