Juristi Faton Fetahu ka reaguar ashpër ndaj nismës së presidentes Vjosa Osmani për procedimin në Kuvend të amendamenteve kushtetuese që parashikojnë zgjedhje të drejtpërdrejta të presidentit. Ai i ka cilësuar këto amendamente si të papërgjegjshme dhe juridikisht absurde, duke theksuar se ato janë shpallur në kundërshtim me Kushtetutën e Kosovës. Fetahu i referohet aktgjykimeve të Gjykatës Kushtetuese, ku është konstatuar se Amendamenti 3, që kufizon kandidimin vetëm për subjektet që kanë kaluar pragun zgjedhor, bie ndesh me Kapitullin II të Kushtetutës. Ai ngre pyetjen se si mund të propozohet për votim një amendament që nuk ka kaluar testin kushtetues dhe e cilëson këtë veprim si mungesë elementare njohjeje të Kushtetutës dhe tallje me rendin kushtetues.