Në një kohë kur tensionet në Lindjen e Mesme po rriten pas operacioneve ushtarake izraelite kundër objektivave iraniane, disa kanale pro-ruse në Telegram po përpiqen të instrumentalizojnë këtë konflikt për të nxitur destabilizim në Kosovë. Këto kanale, përfshirë “BUNT je stanje duha” dhe “СРПСКИ ГЛАСНИК”, kanë publikuar mesazhe që bëjnë thirrje për sulm ndaj bazës amerikane Bondsteel pranë Gjilanit, duke e cilësuar atë si një “objektiv të ligjshëm” në rast të përshkallëzimit të konfliktit. Në mesazhe janë përfshirë koordinatat gjeografike të bazës, si dhe harta të detajuara, të shoqëruara me gjuhë nxitëse dhe retorikë armiqësore, që synojnë mobilizimin për veprime të dhunshme. Ekspertët e sigurisë paralajmërojnë se këto thirrje dhe publikime përbëjnë një rrezik serioz për sigurinë e personelit amerikan dhe stabilitetin rajonal, duke u parë si pjesë e një strategjie propagandistike pro-ruse që lidh konfliktet globale me tensionet lokale në Ballkan.