Deputeti i Lëvizjes Vetëvendosje, Luan Aliu, ka prezantuar kandidaturën e Hatixhe Hoxhës për postin e presidentes së Kosovës. Ai theksoi përvojën e saj të gjatë institucionale dhe angazhimin e vazhdueshëm në shërbim të interesit publik, duke përmendur rolin e saj si ligjëruese në Universitetin e Prishtinës dhe si deputete në dy legjislatura të Kuvendit të Kosovës. Hoxha ka qenë gjithashtu këshilltare në Kuvendin Komunal të Prishtinës dhe bashkëthemeluese e shoqatës së autizmit, si dhe kryesuese e Forumit Kosovar të Aftësisë së Kufizuar. Sipas Aliut, kontributi i saj në ndërtimin e institucioneve dhe përkushtimi ndaj qytetarëve e bëjnë atë një kandidate të denjë për këtë detyrë shtetërore.