Kryetari i Partisë Demokratike Turke të Kosovës, Fikrim Damka, ka deklaruar se dy deputetët e partisë së tij do ta votojnë pa kushte Qeverinë Kurti 4, duke theksuar se prioritet mbetet krijimi sa më i shpejtë i institucioneve të reja. Ai theksoi se mbështetja nuk varet nga marrja e posteve qeveritare, duke theksuar gatishmërinë për bashkëqeverisje me Lëvizjen Vetëvendosje, si në mandatin e kaluar. Damka bëri të ditur se ka pasur kontakte të vazhdueshme me kryeministrin në detyrë, Albin Kurti, ku është diskutuar nevoja urgjente për formimin e qeverisë dhe tejkalimin e krizës politike. Ai gjithashtu bëri thirrje për reflektim nga partitë opozitare dhe bashkëpunim nga komunitetet joshumicë, duke theksuar lodhjen e qytetarëve nga zgjedhjet e shpeshta dhe vonesat në krijimin e institucioneve.