Drejtori i Institutit “Octopus”, Arben Fetoshi, ka reaguar pas kërcënimit të organizatës terroriste serbe “Brigada e Veriut” ndaj kryeministrit në detyrë të Kosovës, Albin Kurti. Ai e ka cilësuar këtë kërcënim jo thjesht si një incident sigurie, por si një mesazh strategjik me synim destabilizimin e situatës në Kosovë para zgjedhjeve të parakohshme më 7 qershor. Sipas Fetoshit, rikthimi i kësaj organizate, e cila kishte qenë e zhdukur, përfaqëson një përpjekje për mobilizim nacionalist dhe për të sinjalizuar ndërhyrje të mundshme nga Serbia. Ai thekson se kërcënimi është një test për qëndrueshmërinë shtetërore dhe reagimin ndërkombëtar ndaj këtyre sfidave, duke paralajmëruar rrezikun e destabilizimit të procesit zgjedhor dhe ndikimit në komunitetin serb në veri të Kosovës.