Koalicioni i OJQ-ve për Mbrojtjen e Fëmijëve (KOMF) ka reaguar ashpër ndaj vendosjes së pagesës ditore prej 3 eurosh për prindërit dhe kujdestarët ligjorë të fëmijëve mbi 15 vjeç në klinikat e QKUK-së dhe spitalet e përgjithshme. KOMF thekson se ky vendim shkel ligjet në fuqi në Kosovë dhe konventat ndërkombëtare, të cilat përcaktojnë se fëmijët janë të gjithë personat nën 18 vjeç dhe kanë të drejtë të kenë pranë prindin ose kujdestarin gjatë qëndrimit në spital pa barrë financiare. Sipas KOMF, prania e prindit është thelbësore për mirëqenien emocionale, psikologjike dhe fizike të fëmijës dhe pagesa e vendosur krijon pengesa për familjet dhe cenon qasjen e barabartë në shërbimet shëndetësore. KOMF i bën thirrje institucioneve që të rishqyrtojnë këtë vendim dhe ta harmonizojnë atë me legjislacionin dhe interesin më të mirë të fëmijës.