Komisioni Evropian ka njoftuar se Kosova është kualifikuar për të marrë pagesën e parë në formën e parafinancimit nga Plani i Rritjes për Ballkanin Perëndimor, pasi Kuvendi i Kosovës ratifikoi marrëveshjet për kredi dhe mjete me BE-në. Megjithatë, Komisioni pret komunikimin formal nga Kosova dhe do të vlerësojë përmbushjen e kushteve të përgjithshme dhe specifike, përfshirë stabilitetin makroekonomik dhe angazhimin në normalizimin e raporteve me Serbinë, para se të kryejë pagesën. Kosova kishte kërkuar parafinancimin që kap rreth 7 për qind të mjeteve të dedikuara nga Plani i Rritjes, që përkthehet në rreth 61 milionë euro. Plani i Rritjes për Ballkanin Perëndimor është një paketë financiare prej 6 miliardë eurosh për periudhën 2024-2027, nga e cila Kosova pritet të përfitojë mbi 880 milionë euro, duke qenë vendi që përfiton më së shumti për kokë banori në rajon.