Anëtarët e Komisionit për Mbikëqyrjen e Agjencisë së Kosovës për Inteligjencë (AKI) zhvilluan më 14 prill një vizitë pune në këtë institucion, në kuadër të mandatit të tyre kushtetues dhe ligjor për mbikëqyrje parlamentare. Kjo ishte vizita e parë e këtij komisioni gjatë Legjislaturës X të Kuvendit të Kosovës dhe kishte karakter njoftues, me qëllim njohjen e drejtpërdrejtë me funksionimin dhe aktivitetet e AKI-së. Gjatë takimit, drejtori, zëvendësdrejtori dhe inspektori i përgjithshëm të AKI-së informuan anëtarët e komisionit mbi realizimin e mandatit ligjor, sfidat aktuale dhe prioritetet në fushën e sigurisë së përgjithshme të Kosovës. Kjo vizitë konsiderohet një hap i rëndësishëm drejt forcimit të transparencës institucionale dhe mbikëqyrjes demokratike të sektorit të inteligjencës në vend.