Komiteti i Rajoneve i Bashkimit Evropian ka vendosur të heqë përdorimin e fusnotës apo asteriksit në emrin "Kosovë" në dokumentet dhe komunikimet e tij zyrtare, duke e harmonizuar këtë qëndrim me Parlamentin Evropian. Ky vendim është bërë publik përmes Asociacionit të Komunave të Kosovës (AKK), ndërsa drejtori i AKK-së, Sazan Ibrahimi, e ka cilësuar si një zhvillim shumë të rëndësishëm institucional dhe një njohje të rolit të pushtetit lokal në Kosovë. Komiteti i Rajoneve gjithashtu ka bërë thirrje për heqjen e masave të Bashkimit Evropian ndaj Kosovës, duke argumentuar se rikthimi i pjesëmarrjes demokratike në zgjedhjet lokale të vitit 2025 dhe përfshirja e të gjitha komuniteteve forcon legjitimitetin e institucioneve komunale dhe nuk ka më arsye për masat ekzistuese. AKK ka theksuar se do të vazhdojë angazhimin për forcimin e rolit të komunave në procesin e integrimit evropian dhe përfaqësimin e interesave të pushtetit lokal në institucionet e BE-së.