Kryetari i Prishtinës, Përparim Rama, ka kërkuar nga Ujësjellësi që të mos kryejë ndërhyrje në rrugët e kryeqytetit pa njoftuar paraprakisht Komunën. Kjo kërkesë erdhi pas dëmtimit të asfaltit në rrugën “Ahmet Krasniqi”, ku punimet kishin mbetur të pasanuara dhe po pengonin trafikun, duke rrezikuar sigurinë publike. Rama ka theksuar se përveç rasteve emergjente, ndërhyrjet duhet të shmangin oraret e pikut të trafikut dhe të koordinohen për sanim të menjëhershëm të dëmeve. Gjithashtu, është kërkuar që të njoftohet edhe Drejtoria e Investimeve Kapitale për të intervenuar sa më shpejt në asfaltimin e sipërfaqeve të dëmtuara.