Asociacioni i Komunave të Kosovës (AKK) ka kërkuar nga Gjykata Kushtetuese të vlerësojë kushtetutshmërinë e Rregullores Nr. 07/2025, e cila sipas tyre cenon autonominë lokale duke centralizuar procedurat e rekrutimit në shërbimin civil. Kërkesa është dorëzuar nga kryetari i Komunës së Rahovecit, Smajl Latifi, në emër të kryetarëve të komunave, por ende nuk ka një përgjigje nga Gjykata. Drejtori ekzekutiv i AKK-së, Sazan Ibrahimi, thekson se centralizimi i kompetencave nga niveli qendror, përmes Ministrisë së Punëve të Brendshme, është në kundërshtim me Kushtetutën dhe mund të dekurajojë profesionistët të aplikojnë për pozitat lokale. Komunat presin një vendim të shpejtë që do t’u mundësojë të vazhdojnë procedurat e rekrutimit në mënyrë autonome, siç kanë bërë deri më tani.