Asociacioni i Komunave të Kosovës (AKK) do të dorëzojë më 28 maj 2026 në Gjykatën Kushtetuese kërkesën për vlerësimin e kushtetutshmërisë së Rregullores Nr. 07/2025 për Procedurën e Pranimit në Shërbimin Civil. Komunat argumentojnë se disa dispozita të kësaj rregulloreje cenojnë parimet e vetëqeverisjes lokale dhe autonominë e tyre në menaxhimin e personelit, duke rritur kontrollin e nivelit qendror mbi administratën komunale dhe ndërhyrjen në kompetencat vetanake. AKK thekson se nuk është kundër reformave në administratë, por kërkon që ato të ndërtohen në partneritet dhe me respekt të plotë për autonominë komunale të garantuar me Kushtetutë. Përmes kësaj lënde, komunat synojnë të mbrojnë rendin kushtetues, decentralizimin dhe funksionimin demokratik të pushtetit lokal në Kosovë.