Asociacioni i Komunave të Kosovës (AKK) ka shprehur shqetësim për ndërhyrjet e nivelit qendror në kompetencat juridike dhe financiare të komunave. Në një takim të Kolegjiumit të Zyrtarëve Ligjor, në bashkëpunim me Misionin e OSBE-së, u diskutua se disa akte të miratuara nga institucionet qendrore po kufizojnë autonominë lokale dhe po krijojnë vështirësi në zbatimin e përgjegjësive komunale. Gjithashtu, komunat po përballen me pasoja financiare nga vendime dhe kontrata në të cilat nuk kanë qenë të përfshira në procesin e vendimmarrjes, duke ndikuar negativisht në planifikimin buxhetor dhe funksionimin e tyre. Pjesëmarrësit theksuan nevojën për koordinim më të madh institucional dhe përfshirjen e komunave në hartimin e akteve juridike, ndërsa rekomandimet do t’i adresohen institucioneve përkatëse për të mbrojtur kompetencat dhe qëndrueshmërinë financiare të komunave.