Drejtori ekzekutiv i Asociacionit të Komunave të Kosovës, Sazan Ibrahimi, ka bërë me dije se komunat po përballen me humbje të mëdha financiare për shkak të padive gjyqësore nga zyrtarët publikë. Kjo situatë është përkeqësuar pas një aktgjykimi të Gjykatës Kushtetuese që rriti normën e kompensimit për përvojën e punës nga 0.25% në 0.5%, duke i dhënë zyrtarëve bazë për ankesa dhe fitore në gjykata. Vetëm gjatë vitit të kaluar, komunave iu janë marrë 126 milionë euro nga këto lëndë, shumica e të cilave lidhen me kontratat kolektive, ndërsa këtë vit pritet një humbje shtesë prej 15 deri në 20 milionë euro. Këto humbje financiare po ndikojnë drejtpërdrejt në buxhetet komunale dhe në aftësinë e tyre për të realizuar projekte dhe ofruar shërbime për qytetarët.