Kryetari i Komunës së Prizrenit, Shaqir Totaj, ka ngritur shqetësime serioze lidhur me barrën financiare që po i ngarkohet komunave për shkak të vendimeve të marra nga niveli qendror, pa konsultim me pushtetin lokal. Ai ka theksuar se zbatimi i Kontratës Kolektive dhe ndryshimet në Grantin e Performancës Komunale, përfshirë përgjysmimin e fondeve nga 4 në 2 milionë euro, po rëndojnë ndjeshëm buxhetet komunale. Totaj ka përmendur gjithashtu moszbatimin e aktgjykimit të Gjykatës Kushtetuese për kompensimin e përvojës së punës dhe ndryshimet në Grantin e Arsimit, që kanë krijuar një barrë shtesë prej rreth 24 milionë euro për komunat këtë vit. Ai paralajmëron se nëse kjo qasje vazhdon, komunat do të humbasin kapacitetin financiar për të investuar në infrastrukturë, zhvillim ekonomik dhe shërbime publike, duke cenuar autonominë dhe vetëqeverisjen lokale.