Zëvendëskryeministri i Parë dhe Ministri i Punëve të Jashtme dhe Diasporës, Glauk Konjufca, priti në takim ambasadorin e Gjermanisë në Kosovë, Rainer Rudolph, i cili e uroi për detyrën e re dhe riafirmoi mbështetjen e Gjermanisë për zhvillimin demokratik dhe perspektivën evropiane të Kosovës. Gjatë takimit u diskutua thellimi i marrëdhënieve ndërmjet dy vendeve, duke theksuar rëndësinë e partneritetit që shtrihet përtej dimensionit bilateral dhe mbështetet në lidhje të forta politike, ekonomike dhe shoqërore. U vlerësua roli i diasporës kosovare dhe i bizneseve të krijuara në Gjermani, si dhe nevoja për rritjen e shkëmbimeve ekonomike dhe bashkëpunimit tregtar. Gjithashtu, u trajtuan zhvillimet rajonale dhe procesi i dialogut, duke theksuar rëndësinë e koordinimit dhe angazhimit për stabilitet dhe përparim në rajon, ndërsa Kosova konfirmoi përkushtimin për zgjerimin e bashkëpunimit me Gjermaninë në të gjitha fushat me interes të përbashkët.