Zëvendëskryeministri i parë dhe ministri i Punëve të Jashtme dhe Diasporës së Kosovës, Glauk Konjufca, priti në takim ambasadorin e Shqipërisë në Kosovë, Petrit Malaj, ku u diskutua për thellimin e bashkëpunimit ndërmjet dy vendeve. Takimi u zhvillua në frymën e marrëdhënieve të veçanta mes Kosovës dhe Shqipërisë, me fokus në interesat strategjike kombëtare dhe koordinimin në politikën e jashtme. Palët theksuan rëndësinë e avancimit të bashkëpunimit ndërinstitucional dhe harmonizimit të qëndrimeve në arenën ndërkombëtare për të vepruar më unifikuar në çështjet me interes të përbashkët. Ambasadori Malaj ftoi Konjufcën të marrë pjesë në Samitin e Diasporës, një ngjarje e përvitshme e organizuar nga Shqipëria për të forcuar lidhjet me diasporën dhe koordinimin e veprimeve kombëtare.