Zëvendëskryeministri i Parë dhe Ministri i Punëve të Jashtme dhe Diasporës, Glauk Konjufca, zhvilloi një takim me ambasadoren e Finlandës në Kosovë, Eevamari Laaksonen, ku u diskutua thellimi i bashkëpunimit dypalësh mes dy vendeve. Fokus u vu në forcimin e sundimit të ligjit, avancimin e reformave dhe rolin e diasporës kosovare në Finlandë, e cila numëron rreth 20 mijë anëtarë dhe shërben si urë lidhëse ndërmjet dy shteteve. Palët diskutuan gjithashtu nisjen e procedurave për njohjen e ndërsjellë të patentë-shoferëve, një hap që do të lehtësonte lëvizjen dhe integrimin e qytetarëve në të dy vendet. Ambasadorja Laaksonen uroi Konjufcën për mandatin e ri dhe riafirmoi mbështetjen e Finlandës për zhvillimin demokratik dhe perspektivën evropiane të Kosovës, ndërsa Kosova theksoi përkushtimin për forcimin e partneritetit me Finlandën.