Zëvendëskryeministri i parë dhe ministri i Punëve të Jashtme dhe Diasporës i Kosovës, Glauk Konjufca, ka përfaqësuar Kosovën në Forumin e Diplomacisë në Antalya, Turqi, ku janë diskutuar tema kyçe për rajonin e Ballkanit Perëndimor dhe zhvillimet globale. Forumi, i organizuar nga ministri i Jashtëm turk Hakan Fidan, ka mbledhur ministrat e jashtëm të vendeve të Ballkanit për të theksuar rëndësinë e bashkëpunimit dhe koordinimit rajonal në një periudhë të ndryshimeve të mëdha gjeopolitike. Konjufca ka vlerësuar mbështetjen e Turqisë për stabilitetin dhe zhvillimin e Ballkanit Perëndimor, duke ritheksuar nevojën për bashkëpunim më të ngushtë mes vendeve të rajonit. Në fokus të diskutimeve ishin ndikimet e zhvillimeve ndërkombëtare në rajon dhe nevoja për një përkushtim të përbashkët për të përballuar sfidat e ardhshme.