Ministri i Punëve të Jashtme të Kosovës, Glauk Konjufca, gjatë qëndrimit të tij në New York për seancën e Këshillit të Sigurimit, zhvilloi takime me përfaqësues të mërgatës shqiptare në Amerikë. Ai e cilësoi mërgatën si një faktor kyç për zhvillimin dhe integrimin euro-atlantik të Kosovës, duke vlerësuar rolin historik të saj në rrugën drejt lirisë dhe shtetësisë. Konjufca njoftoi se këto takime janë fillimi i një serie angazhimesh për të rritur mbështetjen dhe organizimin e diasporës shqiptare në SHBA. Ai theksoi se mërgata mbetet një nyje e rëndësishme që lidh Kosovën me Shtetet e Bashkuara në çdo aspekt dhe do të jetë prioritet i Qeverisë së Kosovës për të fuqizuar veprimtarinë e saj në shërbim të kombit.