Në Tallinn u zhvilluan konsultimet politike ndërmjet Kosovës dhe Estonisë, të drejtuara nga Sekretari i Përgjithshëm i MPJD-së së Kosovës, Ilir Muçaj, dhe Drejtoresha e Përgjithshme për Çështje Evropiane të Estonisë, Siiri Königsberg. Gjatë takimit u diskutuan marrëdhëniet bilaterale dhe mundësitë për thellimin e bashkëpunimit në fusha si zhvillimi digjital, inovacioni, arsimi dhe mbrojtja. Palët shkëmbyen pikëpamje për procesin e integrimit euro-atlantik të Kosovës dhe situatën gjeopolitike në Evropë, duke përfshirë agresionin rus ndaj Ukrainës dhe ndikimet në sigurinë rajonale. Estonia rikonfirmoi mbështetjen për perspektivën evropiane të Kosovës, ndërsa të dyja vendet shprehën gatishmërinë për vazhdimin e dialogut politik dhe zgjerimin e bashkëpunimit në fusha me interes të përbashkët.