Ambasada e Mbretërisë së Bashkuar ka mohuar kategorikisht çdo përfshirje në propozimin apo mbështetjen e kandidatit për presidente të Kosovës, duke i cilësuar si të pavërteta pretendimet e kryeministrit në detyrë Albin Kurti dhe kandidatës së Vetëvendosjes, Feride Rushiti. Kjo e fundit kishte deklaruar publikisht se mbështetjen për kandidaturën e saj e kishte marrë nga “partnerët ndërkombëtarë”, duke përmendur në veçanti ambasadën britanike dhe kontaktet me ambasadoren amerikane. Ambasada britanike theksoi se roli i saj është vetëm inkurajimi i partive politike për të vepruar në përputhje me ligjin dhe Kushtetutën, duke mos u përfshirë në propozimin e kandidatëve. Situata ka shkaktuar tension në skenën politike të Kosovës, ndërsa vendi përgatitet për zgjedhje të reja kombëtare pas dështimit të partive për të arritur marrëveshje për zgjedhjen e presidentit.