Organizata Demokraci Plus (D+) ka kërkuar anulimin e tenderit të Komunës së Prizrenit, me vlerë 327,600 euro, për angazhimin e 14 konsulentëve për një periudhë trevjeçare. Sipas D+, detyrat e parapara në tender nuk përbëjnë shërbime të veçanta, por punë administrative që duhet të mbulohen përmes konkurseve të rregullta të punësimit. Organizata thekson se kontratat prej 36 muajsh tregojnë nevoja të përhershme të institucionit, duke kundërshtuar përdorimin e Marrëveshjeve për Shërbime të Veçanta, të cilat ligji i lejon vetëm për ekspertizë të jashtme të përkohshme. Demokraci Plus i ka bërë thirrje Komunës së Prizrenit të anulojë tenderin dhe institucioneve përgjegjëse të shqyrtojnë procedurën për të siguruar zbatimin e legjislacionit për prokurimin publik.