Ministrja e Mjedisit dhe Planifikimit Hapësinor, Fitore Pacolli, ka bërë të ditur se gjatë dy javëve të fundit Inspektorati i Mjedisit ka kryer 52 inspektime në kuadër të mbrojtjes së mjedisit dhe zbatimit të ligjit. Gjatë kësaj periudhe janë shqiptuar 39 gjoba administrative dhe janë nxjerrë 32 vendime për ndërprerje të punimeve, duke treguar një angazhim të shtuar për kontrollin e ndërtimeve dhe mbrojtjen e natyrës. Inspektorati ka përgatitur gjithashtu 23 raporte dhe përgjigje ndaj palëve të përfshira, duke vijuar punën për garantimin e ligjshmërisë në fushën e planifikimit dhe ndërtimit. Ministrja Pacolli theksoi se ky proces do të vazhdojë me qëllim që të sigurohet një mjedis i pastër dhe i gjelbër, ku ligji zbatohet në mënyrë të barabartë për të gjithë dhe interesi publik është prioritet.