Policia e Kosovës, në bashkëpunim me Infrakosin dhe me mbështetjen e ministrive të Infrastrukturës, Punëve të Brendshme dhe Ekonomisë, ka asistuar në marrjen nën kontroll të katër nënstacioneve hekurudhore në komunat e Zveçanit dhe Leposaviqit në veri të Kosovës. Ky aksion ka përfunduar me rikthimin e plotë të menaxhimit të këtyre objekteve nga Ndërmarrja Publike INFRAKOS, pas periudhës kur ato ishin uzurpuar nga struktura paralele serbe. Ministri në detyrë i Infrastrukturës, Dimal Basha, ka theksuar rëndësinë e këtij veprimi për forcimin e rendit institucional dhe për shtrirjen e autoritetit shtetëror në këtë zonë strategjike, si dhe për mbrojtjen e aseteve publike. Ky hap pritet të lehtësojë rehabilitimin dhe modernizimin e infrastrukturës hekurudhore në veri, pjesë kyç e Koridorit X që lidh Kosovën me rrjetet rajonale dhe ndërkombëtare të transportit.