Ministri i Mbrojtjes në detyrë i Kosovës, Ejup Maqedonci, ka deklaruar se Kosova qëndron në krah të partnerëve dhe aleatëve në mbështetje të paqes dhe sigurisë globale. Kjo u shpreh pas pjesëmarrjes së tij në takimin e 35-të të Grupit të Kontaktit për Mbrojtjen e Ukrainës në Bruksel, ku morën pjesë rreth 50 ministra të mbrojtjes nga vendet anëtare të NATO-s dhe shtetet partnere. Gjatë takimit, i udhëhequr nga ministrat e mbrojtjes të Gjermanisë, Mbretërisë së Bashkuar dhe Sekretari i Përgjithshëm i NATO-s, u rikonfirmua mbështetja e palëkundur për Ukrainën në mbrojtjen e sovranitetit dhe integritetit territorial kundër agresionit rus. Në margjinat e takimit, Maqedonci zhvilloi diskutime me zyrtarë të NATO-s dhe ministra të mbrojtjes, duke theksuar bashkëpunimin në fushën e mbrojtjes dhe sfidat aktuale të sigurisë.