Ushtruesja e detyrës së presidentes së Kosovës, Albulena Haxhiu, ka theksuar se Kosova ka përcaktuar qartë drejtimin e saj evropian dhe ka përmbushur përgjegjësitë për anëtarësim në Bashkimin Evropian. Ajo kërkon që përmbushja e këtyre përgjegjësive të vlerësohet me të njëjtat standarde si për vendet e tjera që synojnë anëtarësimin në BE. Në shënimin e fillimit të Presidencës së Irlandës në Këshillin e BE-së, Haxhiu ka theksuar se zgjerimi i BE-së është çështje besueshmërie dhe sigurie për Evropën. Ajo shpreson që Presidenca irlandeze të ndihmojë që procesi i zgjerimit të mbetet i besueshëm dhe që Kosova të mos mbetet peng i bllokadave politike që nuk varen nga përparimi i saj, ndërkohë që aplikimi i Kosovës për anëtarësim në BE, i dorëzuar në vitin 2022, ende nuk është shqyrtuar.