Ushtruesja e detyrës së presidentes së Kosovës, Albulena Haxhiu, priti ambasadorin e ri të Mbretërisë së Belgjikës në Kosovë, Arnaud Dusaucy, duke pranuar letrat kredenciale të tij dhe duke i uruar sukses në misionin diplomatik. Ajo theksoi marrëdhëniet e mira ndërmjet Kosovës dhe Belgjikës, të ndërtuara mbi miqësi, partneritet dhe përkrahje të vazhdueshme që nga periudha e luftës dhe njohja e pavarësisë së Kosovës. Gjatë takimit u diskutua për mundësitë e zgjerimit të bashkëpunimit politik dhe ekonomik, për rritjen e shkëmbimeve tregtare dhe investimeve, si dhe për perspektivën evropiane dhe euroatlantike të Kosovës. Haxhiu shprehu besimin se gjatë mandatit të ambasadorit Dusaucy do të avancohen marrëdhëniet ndërmjet dy vendeve dhe do të hapen fusha të reja bashkëpunimi në interes të qytetarëve.