Zëvendësministri i Punëve të Jashtme dhe Diasporës së Kosovës, Kreshnik Ahmeti, zhvilloi një takim të rëndësishëm me të Dërguarën e Posaçme të Mbretërisë së Bashkuar për Ballkanin Perëndimor, Dame Karen Pierce, gjatë vizitës së tij në Londër. Në fokus të bisedimeve ishte thellimi i bashkëpunimit ndërmjet dy vendeve, përgatitjet për mbledhjen e ardhshme të Këshillit të Partneritetit dhe koordinimi në çështjet e sigurisë rajonale dhe sfidat globale. Palët riafirmuan rëndësinë e partneritetit të ngushtë dhe Kosova shprehu mirënjohjen për mbështetjen e vazhdueshme të Britanisë në fusha të ndryshme. Pas takimit, Ahmeti vizitoi Ambasadën e re të Kosovës në Londër, duke njohur nga afër ambientet dhe punën e misionit diplomatik në Mbretërinë e Bashkuar.