Autoriteti i Aviacionit Civil i Kosovës ka organizuar ceremoninë e nënshkrimit të Marrëveshjes së Punës me Agjencinë e Bashkimit Evropian për Sigurinë e Aviacionit (EASA), duke shënuar një hap të rëndësishëm në bashkëpunimin ndërmjet dy palëve. Kjo marrëveshje, e nënshkruar më 3 gusht nga drejtori ekzekutiv i EASA-s dhe më 14 gusht nga pala kosovare, synon integrimin më të thellë të sistemit të aviacionit civil të Kosovës në mekanizmat evropianë të sigurisë. Ajo do t’i mundësojë Autoritetit të Aviacionit Civil të Kosovës qasje në bazën evropiane të të dhënave për sigurinë, auditime të performancës dhe bashkëpunim teknik e shkëmbim ekspertize. Ky bashkëpunim pritet të rrisë kapacitetet profesionale dhe institucionale të AAC-së, duke e vendosur Kosovën në rrugën e avancimit në sektorin e aviacionit civil në rajonin e Ballkanit Perëndimor.