Zëvendësministri i Punëve të Jashtme dhe Diasporës së Kosovës, Kreshnik Ahmeti, zhvilloi një takim me homologen e tij nga El Salvadori, Adriana Mira, ku u nënshkrua Marrëveshja për Konsultime Politike dhe Memorandumi i Bashkëpunimit në Fushën e Kulturës. Këto marrëveshje synojnë thellimin dhe strukturimin e marrëdhënieve dypalëshe, duke krijuar mekanizma të rregullt dialogu dhe bashkëpunimi për çështje me interes të përbashkët. U dakordua që konsultimet e para politike të mbahen së shpejti në Prishtinë, ku Ahmeti ftoi zëvendësministren Mira për një vizitë në Kosovë. Gjatë takimit u diskutua gjithashtu për zgjerimin e bashkëpunimit në fusha të tjera si ekonomia, arsimi, energjia, turizmi dhe heqja e regjimit të vizave për qytetarët e Kosovës nga El Salvadori. Në kuadër të vizitës, Ahmeti pati edhe një takim me Ministrin e Kulturës së El Salvadorit, Raul Neftalí Castillo Rosales, për të avancuar bashkëpunimin kulturor, me fokus në shkëmbimin e përvojave dhe promovimin e trashëgimisë kulturore.