Kosova dhe Kolumbia kanë nënshkruar tri marrëveshje të rëndësishme që përfshijnë heqjen e vizave për pasaportat diplomatike dhe zyrtare, konsultime politike ndërmjet dy ministrive të punëve të jashtme, si dhe një memorandum bashkëpunimi ndërmjet akademive diplomatike të dy vendeve. Kjo u arrit pas një takimi ndërmjet zëvendësministrit të Punëve të Jashtme dhe Diasporës së Kosovës, Kreshnik Ahmeti, dhe homologes së tij kolumbiane, Paula Andrea Cerón Arboleda, ku u riafirmua angazhimi për forcimin e marrëdhënieve dypalëshe dhe avancimin e bashkëpunimit në fusha me interes të përbashkët. Gjatë takimit u diskutua edhe mundësia e heqjes së vizave për mbajtësit e pasaportave të rregullta, ku palës kolumbiane iu dorëzua një draft fillestar për këtë çështje, duke hapur rrugën për lehtësimin e lëvizjes së qytetarëve. Në kuadër të vizitës në Kolumbi, zëvendësministri Ahmeti zhvilloi takime të tjera me përfaqësues të ministrive të mbrojtjes, kulturës, arsimit, sportit dhe bujqësisë, duke identifikuar mundësi konkrete për bashkëpunim të mëtejshëm dhe duke nënshkruar gjithsej gjashtë marrëveshje që forcojnë praninë dhe partneritetet e Kosovës në Amerikën Latine.