Ministri i Mbrojtjes së Kosovës, Ejup Maqedonci, priti shefin e zyrës së Luksemburgut në Kosovë, Eric Dietz, ku diskutuan thellimin e bashkëpunimit bilateral në fushën e sigurisë dhe mbrojtjes. Gjatë takimit u theksua rëndësia e forcimit të kapaciteteve në sigurinë kibernetike dhe ndërtimit të mekanizmave të përbashkët të mbrojtjes përballë sfidave dhe kërcënimeve hibride. Po ashtu, u diskutua bashkëpunimi në industrinë e mbrojtjes, me fokus në zhvillimin e kapaciteteve moderne për rritjen e gatishmërisë dhe qëndrueshmërisë institucionale. Ministria e Mbrojtjes e Kosovës theksoi përkushtimin për të thelluar partneritetin me Luksemburgun përmes projekteve konkrete dhe bashkëpunimit afatgjatë në funksion të sigurisë dhe stabilitetit.