Ministri në detyrë i Mbrojtjes së Kosovës, Ejup Maqedonci, zhvilloi një takim me Zëvendës Ndihmës Sekretarin e Përgjithshëm për Partneritete në NATO, Kevin Hamilton, ku u diskutua thellimi i bashkëpunimit strategjik mes Kosovës dhe NATO-s. Gjatë bisedimeve u ritheksua përkushtimi i Kosovës për integrimin euro-atlantik dhe modernizimin e Forcës së Sigurisë së Kosovës në përputhje me standardet e NATO-s. U theksua rëndësia e vazhdimit të pranisë së NATO-s dhe KFOR-it për ruajtjen e paqes dhe stabilitetit në Ballkanin Perëndimor. Në këtë kuadër, Kosova synon të kalojë nga një konsumuese e sigurisë në një kontribuese aktive për sigurinë rajonale dhe ndërkombëtare.