Kosova vazhdon të mbetet jashtë INTERPOL-it, pavarësisht përpjekjeve të shumta dhe rëndësisë strategjike që ka anëtarësimi për sigurinë dhe subjektivitetin ndërkombëtar të vendit. Në vitin 2018, Kosova dështoi të sigurojë shumicën e nevojshme të votave gjatë Asamblesë së Përgjithshme të INTERPOL-it në Dubai, ku mori mbështetje nga 76 shtete në raundin e parë dhe 68 në të dytin, por kjo nuk mjaftoi për pranimin. Eksperti i sigurisë Burim Ramadani thekson se anëtarësimi do t’i mundësonte Policisë së Kosovës qasje të drejtpërdrejtë në rrjetet ndërkombëtare të të dhënave, duke forcuar luftën kundër krimit të organizuar dhe trafikimit. Ai nënvizon nevojën për një angazhim më të madh diplomatik dhe një fushatë lobimi aktive, duke e konsideruar këtë objektiv si një prioritet shtetëror që nuk duhet të braktiset.