Kryenegociatori i Kosovës me Bashkimin Evropian, Jeton Zulfaj, theksoi gjatë Konferencës së IX të Ambasadorëve se Kosova ka argumente të fuqishme për të marrë statusin e vendit kandidat dhe për të hapur negociatat për anëtarësim në BE. Ai përmendi se Kosova është një demokraci dinamike me ekonomi të qëndrueshme, e harmonizuar me Politikën e Përbashkët të Jashtme dhe të Sigurisë të BE-së, si dhe një partner i besueshëm dhe proaktiv i Bashkimit Evropian. Përparimi i Kosovës drejt BE-së kontribuon në forcimin e institucioneve demokratike dhe stabilitetin rajonal. Gjithashtu, Zulfaj vlerësoi rolin e rëndësishëm të misioneve diplomatike të Kosovës në avancimin e argumenteve dhe agjendës së anëtarësimit në BE.