Ministritë e Mjedisit të Kosovës dhe Shqipërisë kanë nënshkruar një Memorandum Mirëkuptimi për menaxhimin e qëndrueshëm të segmentit ndërkufitar të Lumit Drin. Kjo marrëveshje synon mbrojtjen dhe përmirësimin e cilësisë së ujërave, parandalimin e ndotjes ndërkufitare dhe ruajtjen e ekosistemeve dhe biodiversitetit në zonën e lumit. Në kuadër të bashkëpunimit do të krijohet një Grup i Përbashkët Pune, i cili do të organizojë aktivitete të përbashkëta për monitorim dhe pastrim, si dhe do të shkëmbejë të dhëna dhe ekspertizë teknike. Ky bashkëpunim pritet të kontribuojë gjithashtu në avancimin e proceseve të integrimit evropian të të dy vendeve, veçanërisht në fushën e mjedisit dhe ndryshimeve klimatike.