Qeveria e Kosovës ka miratuar projektligjin për marrëveshjen me Shqipërinë lidhur me organizimin e Lojërave Mesdhetare “Prishtina 2030”. Sipas kryeministrit Albin Kurti, kjo marrëveshje është një iniciativë strategjike që synon të sigurojë organizimin e suksesshëm të ngjarjes përmes një bashkëpunimi të ngushtë ndërmjet dy vendeve. Kosova do të jetë shteti mikpritës, ndërsa Shqipëria do të ketë rolin e partnerit për organizimin e disiplinës së lundrimit në Durrës. Ky bashkëpunim pritet të forcojë marrëdhëniet ndërmjet dy vendeve, të promovojë Kosovën në arenën ndërkombëtare dhe të kontribuojë në zhvillimin e sportit dhe ekonomisë rajonale.