Ministri në detyrë i Bujqësisë së Kosovës, Armend Muja, së bashku me homologun e tij shqiptar, Andis Salla, nënshkruan dy marrëveshje për thellimin e bashkëpunimit në sektorin e bujqësisë dhe zhvillimit rural. Marrëveshjet synojnë forcimin e koordinimit institucional, avancimin e politikave të përbashkëta, si dhe rritjen e standardeve në sigurinë ushqimore, veterinarinë dhe fitosanitetin. Një fokus i veçantë është vendosur në modernizimin e sektorit përmes digjitalizimit, inovacionit dhe transferimit të teknologjive bashkëkohore për të rritur efikasitetin dhe konkurrueshmërinë. Ky bashkëpunim konsiderohet një hap i rëndësishëm drejt konsolidimit të partneritetit strategjik ndërmjet dy vendeve, duke kontribuar në zhvillimin e qëndrueshëm të bujqësisë dhe përmirësimin e mirëqenies së komuniteteve rurale.